МОНГОЛ УЛСАД ХҮҮХДИЙН БАЙГУУЛЛАГА ҮҮСЧ ХӨГЖСӨНИЙ 93 ЖИЛИЙН ОЙ ТОХИОЖ БАЙНА.

Монголын орчин үеийн утга зохиолыг үндэслэгч, соён гэгээрүүлэгч, нийгэм улс төрийн нэрт зүтгэлтэн, их зохиолч Дашдоржийн Нацагдорж тэртээх 1925 оны 05 сарын 08-ны энэ өдөр Монгол улсад анхны “Хойчийг залгамжлагч багачуудын холбоо” нэртэй Пионерийн байгууллагыг байгуулснаар одоогийн хүүхдийн байгууллагын түүх бичигдэж эхлэн эдүгээ 93 жилийн ойтойгоо золгож байна.
Энэхүү тэмдэглэлт өдрийн хүрээнд Хүүхдийн байгууллагыг үндэслэгч, их зохиолч Д.Нацагдоржийн хөшөөнд хүндэтгэлийн цэцэг өргөх ёслолын үйл ажиллагаа жил бүр уламжлал болгон зохион байгуулдаг билээ.
Энэ жилийн ёслол хүндэтгэлийн арга хэмжээнд Хөдөлмөр нийгмийн хамгааллын яамны удирдлага, Засгын газрын хэрэгжүүлэгч агентлаг Гэр бүл хүүхэд, залуучуудын хөгжлийн газрын дэд дарга Б.Халиун, Нийслэлийн засаг даргын орлогч Д.Энхтөр, Нийслэлийн хүүхэд гэр бүлийн хөгжлийн газрын дарга Ө.Ган-Өлзий, Нийслэлийн 9 дүүргийн Гэр бүл, хүүхэд, залуучуудын хөгжлийн хэлтсийн дарга, мэргэжилтэнүүд болон хүүхдийн байгууллагын үе үеийн ахмад ажилтанууд, хүүхэд багачууд, хүүхдийн холбооны гишүүд оролцлоо.
Цэцэг өргөх ёслолыг албан ёсоор нээж Засаг даргын орлогч Д.Энхтөр үг хэлсэн бөгөөд хүүхдийн байгууллагын үе үеийн ахмад ажилтнууд болон хүүхдийн байгууллагад одоо ажиллаж байгаа нийт хүмүүст баярын мэнд дэвшүүлэн цаашдын хэрэгжүүлэх үйл ажиллагаанд нь амжилтыг хүссэн.
Дараа нь нийслэлийн хүүхдийн холбооны гишүүд хүүхдүүд болон хүүхдийн байгууллагын ахмад үеийнхэн их зохиолч Д.Нацагдоржийн хөшөөнд цэцгээ өргөж, Бүхий олон багачууд дуугаа эгшиглүүлэн хүндэтгэл үзүүллээ.
DSC_0203